Adeiladu ar lwyddiant grantiau busnes
Wedi ei bostio ar Tuesday 19th September 2023
Mae Cyngor Dinas Casnewydd yn cynnig mwy o gymorth ariannol i fusnesau lleol diolch i gyllid gan gronfa ffyniant gyffredin Llywodraeth y DU, sy'n rhan o'i agenda codi'r gwastad.
Ers sawl blwyddyn, mae'r cyngor wedi rhoi grantiau i fusnesau bach a chanolig yn y ddinas i helpu gyda busnesau newydd a chostau eraill ac mae hyn yn parhau.
Fodd bynnag, bydd y rhaglen grantiau cyflymu twf newydd yn datblygu cynllun llwyddiannus iawn trwy gynnig grantiau rhwng £25,000 a £75,000 tuag at fuddsoddiad cyfalaf.
Dywedodd y Cynghorydd Jane Mudd, Arweinydd Cyngor Dinas Casnewydd: “Mae ein gweledigaeth uchelgeisiol ar gyfer twf a datblygiad y ddinas yn golygu bod canol y ddinas yn destun un o'r rhaglenni adfywio mwyaf yn y DU.
"Hyd yn hyn mae'r prosiectau a gyflawnwyd wedi cyflawni trawsnewidiad a chyfleoedd sylweddol. Mae cynyddu hyder yng Nghasnewydd wedi gosod y sylfeini i'r ddinas fanteisio ar ei photensial economaidd.
"Ond ni all y cyngor wneud hyn ar ei ben ei hun ac rydym wedi mabwysiadu dull cydweithredol gyda'n busnesau lleol mentrus. Nhw yw anadl einioes ein cymunedau a'n heconomi.
"Gwyddom fod y sector busnes wedi wynebu heriau yn ystod y blynyddoedd diwethaf ac felly rydym eisiau parhau i gynnig cymorth pryd bynnag a sut bynnag y gallwn.
"Gwyddom fod grantiau busnes Dinas Casnewydd wedi gwneud gwahaniaeth gwirioneddol i lawer o fusnesau bach a chanolig a nawr bydd y rhaglen cyflymu twf yn helpu cwmnïau presennol a mewnfuddsoddwyr i wneud ymrwymiad sylweddol i dwf hirdymor yr economi leol.
“Gyda'n gilydd, gallwn sicrhau bod dinas Casnewydd yn cyflawni ei photensial er budd yr economi leol, y busnesau a'r preswylwyr.”
Mae'r rhaglen cyflymu twf wedi'i hanelu at gwmnïau sefydledig neu newydd i sefydlu adeiladau neu i fusnesau presennol y ddinas gyflymu eu cynlluniau ar gyfer twf.
Bydd y grantiau'n cael eu cynnig fel arian cyfatebol ar gyfer offer sy'n hanfodol ar gyfer sefydlu busnes newydd neu sy'n galluogi'r busnes i dyfu'n sylweddol.
Mae darpar ymgeiswyr yn cael eu gwahodd i gysylltu â thîm gwasanaethau busnes arbenigol y cyngor i ddechrau, a all drafod y broses gyda nhw ac asesu eu cymhwysedd. Disgwylir i'r cynllun barhau tan ddechrau 2025.
Dylai unrhyw un sydd â diddordeb e-bostio [email protected]