Gwasanaeth codi baner y Gymanwlad yn y Ganolfan Ddinesig
Wedi ei bostio ar Friday 8th March 2019
Mae Cyngor Dinas Casnewydd yn nodi Gŵyl y Gymanwlad gyda gwasanaeth codi'r faner ar ddydd Llun 11 Mawrth.
Bydd y seremoni yn cael ei chynnal yn Neuadd Ddinesig Casnewydd, am 10am, dan arweiniad Caplan y Maer, y Parchedig Diane Notley.
Yn ystod y gwasanaeth bydd Maer Casnewydd, y Cynghorydd Malcolm Linton, yn darllen neges bersonol gan Ysgrifennydd Cyffredinol Gwledydd y Gymanwlad, y Gwir Anrhydeddus Patricia Scotland.
Bydd Cadarnhad y Gymanwlad, a ysgrifennwyd yn arbennig, yn cael ei ddarllen gan Ddirprwy Arglwydd Raglaw Gwent, y Lefftenant Gyrnol Andrew Tuggey, cyn codi'r faner, gweithred a gaiff ei hailadrodd ym mhedwar ban byd.
Bydd pobl o bob oedran a chefndir yng ngwledydd y Gymanwlad yn ailymrwymo i weithio "tuag at ddyfodol cyffredin", y thema ar gyfer eleni a chyfarfod penaethiaid llywodraethau'r Gymanwlad sy'n cael ei gynnal yn y DU ym mis Ebrill.