Newyddion

Casnewydd yn croesawu athletwyr sy'n ysbrydoli i Gemau Trawsblannu Prydain 2019

Wedi ei bostio ar Tuesday 22nd January 2019
BTG Flame lighting - low res - 2

Lansiwyd Gemau Trawsblannu Prydain Westfield Health 2019 yn swyddogol heddiw wrth i’r Fflam Rhoddwyr Teuluol gael ei chynnal yng Nghasnewydd.

Bydd y Gemau’n cael eu cynnal rhwng 25 a 28 Gorffennaf 2019. Mae disgwyl i’r digwyddiad ddenu dros 850 o athletwyr sydd wedi cael trawsblaniad a dros 1,500 o gefnogwyr, gan gynnwys teuluoedd sydd wedi  rhoi organau, i’r ddinas.

Mae’r Gemau wedi'u trefnu ar ran yr elusen Transplant Sport UK, a'r nod yw codi ymwybyddiaeth o roi organau a chynyddu nifer yr organau sy’n cael eu rhoi.

Bydd Cyngor Casnewydd, Casnewydd Fyw, Llywodraeth Cymru a threfnwyr y Gemau'n gweithio mewn partneriaeth i wneud y digwyddiad yn well nag erioed.

Dywedodd Ann Lloyd CBE, Cadeirydd Bwrdd Iechyd Prifysgol Aneurin Bevan a Chadeirydd Pwyllgor Trefnu Lleol y Gemau: “Mae Cymru wedi arwain y ffordd yn y DU o ran ei hagwedd at roi organau, a chyflwyno caniatâd tybiedig. Fodd bynnag, mae llawer rhagor i’w wneud i godi ymwybyddiaeth o’i bwysigrwydd ac i annog pobl i gael y trafodaethau rheiny – sy’n anodd weithiau – gyda’u hanwyliaid.

 “Nid yn unig y mae’r Gemau yn cydnabod trawsblaniad fel rhodd anhygoel – fel y mae’r rhai o bob oedran sy’n ei dderbyn yn gallu byw bywyd iach, actif a normal – ond mae hefyd yn anrhydeddu'r rhoddwyr.”

Dywedodd Dirprwy Brif Swyddog Meddygol Llywodraeth Cymru, Chris Jones, a oedd yn y lansiad: “Mae’r Gemau’n ddathliad. Mae modd i’r athletwyr yma gystadlu oherwydd caredigrwydd rhoddwyr organau di-ri a’u teuluoedd sydd wedi rhoi anadl einioes.    

 “Bydd hefyd yn helpu i annog pobl i siarad am eu penderfyniad o ran rhoi organau. Mae sgwrs gyflym yn gallu bod o fudd i bobl Cymru a'r DU. Os yw eich teulu’n gwybod am eich penderfyniad ac yn ei barchu, gallai hynny leihau nifer y bobl sy'n marw wrth ddisgwyl organ addas. Gall drawsnewid bywydau.

 “Rydyn ni’n dymuno Gemau llwyddiannus i bawb a fydd yn rhan ohonyn nhw."

Dywedodd Dirprwy Arweinydd Cyngor Dinas Casnewydd, y Cynghorydd Mark Whitcutt: “Mae’n anrhydedd gennym groesawu’r Gemau i’n dinas. Mae gan Gasnewydd hanes rhagorol o gynnal digwyddiadau chwaraeon gan gynnwys Cwpan Ryder, y Felothon, pencampwriaethau beicio trac a gwersyllfaoedd hyfforddi Olympaidd a Pharalympaidd – ond bydd y digwyddiad hwn yn rhywbeth arbennig i'r ddinas. 

 “Mae’r athletwyr hyn yn ysbrydoli a bydd y Gemau'n lledaenu neges sydd mor bwysig.”

Mae Gemau Trawsblannu Prydain Westfield Health yn cynnwys mwy na 25 o ddigwyddiadau chwaraeon a chymdeithasol a chystadlaethau i bobl o bobl gallu, o bysgota i drac a chae, gan gynnwys Ras y Rhoddwyr - digwyddiad cynhwysol a fydd yn agored i’r cyhoedd.

Bydd y Gemau’n ategu ymgyrchoedd sy’n digwydd yn lleol i addysgu a chodi ymwybyddiaeth am roi organau a’r pwysigrwydd o rannu'ch penderfyniad â'ch anwyliaid.

Mae’r noddwyr, Westfield Health, yswirwyr iechyd nid-er-elw blaenllaw, wedi bod yn rhan o'r Gemau ers dros ddegawd.

Dywedodd David Capper, Prif Weithredwr Westfield Health: “Rydyn ni’n falch iawn o fod wedi bod yn rhan o’r Gemau am nifer o flynyddoedd ac yn edrych ymlaen at weld y digwyddiad yn dod i Gymru.  Mae’n drist iawn bod tri pherson yn marw bob dydd yn disgwyl am drawsblaniad.  Nid oes rhaid edrych yn bell i ddod o hyd i rywun sydd wedi cael ei gyffwrdd gan gyfrannu organau.

“Mae Westfield Health wedi ymrwymo i wneud gwahaniaeth iach i ansawdd bywyd ein cwsmeriaid a’r cymunedau lle maen nhw’n byw ac yn gweithio ynddynt – nid oes ffordd well o wella bywydau na rhoi’r anrheg o fywyd.”

Heddiw, mae Gemau Trawsblannu Prydain yn croesawu mwy na 50 o dimau o ysbytai ledled y DU (ac mae ymwelwyr yn parhau i ddod o dramor) sy’n dod ynghyd i rannu eu profiadau personol, i gystadlu, ac i ddiolch i'r teuluoedd sydd wedi rhoi organau, sy'n dod yn rhan gynyddol o'r Gemau.

Mae Gemau Prydain hefyd yn llwybr i bobl sydd am gael eu dewis i gystadlu yng Ngemau Trawsblannu'r Byd, sy'n digwydd am yr ail flwyddyn. Mae Tîm GB gyda'r mwyaf o faint a'r mwyaf llwyddiannus.

More Information

Nid oes unrhyw ganlyniadau sy'n cyfateb i'ch meini prawf.