Newyddion

Y Cyngor i wneud cais am arian ar gyfer rhaglen gwella ysgol uchelgeisiol

Yn ei gyfarfod ar 19 Gorffennaf, bydd Cabinet Cyngor Dinas Casnewydd yn ystyried cynnig am gyllid i wneud gwelliannau gwerth £70 miliwn i ysgolion yn y ddinas.

Nod rhaglen Ysgolion yr 21ain Ganrif Llywodraeth Cymru yw lleihau nifer yr ysgolion a’r colegau sydd mewn cyflwr gwael a sicrhau bod gan Gymru ysgolion o’r maint iawn a cholegau yn y lleoliadau iawn.

Yn rhan o'r rhaglen, mae modd i awdurdodau lleol wneud cais am gyllid i gynnal y gwaith hwnnw yn eu hardaloedd.

Mae Cyngor Dinas Casnewydd yn cynnig cyflwyno rhaglen o welliannau gwerth £70 miliwn, ac mae’n gofyn i Lywodraeth Cymru ariannu 50 y cant.

Mae’r ysgolion sydd wedi’u cynnwys yn y cynnig wedi cael eu dewis yn unol ag amcanion y Cyngor a blaenoriaethau strategol y Rhaglen. Mae ysgolion wedi cael blaenoriaeth ar sail eu cyflwr, nifer y lleoedd ysgol sydd ar gael yn yr ardal, a ffyrdd o ddefnyddio asedau presennol orau. 

Ysgolion uwchradd

Cynigir gwelliannau i’r ysgolion canlynol, gan gynnwys gwaith i newid adeiladau dros dro a gwaith ailfodelu er mwyn sicrhau bod digon o leoedd ysgol:

• Ysgol Basaleg
• Ysgol Uwchradd Caerllion
• Ysgol Gyfun Gwent Is Coed

Ysgolion cynradd

Cynigir gwelliannau ar y safle, gan gynnwys mewn mannau arlwyo a mannau allanol, er mwyn gwella cyfleusterau a chreu rhagor o leoedd ysgol, yn yr ysgolion canlynol:

• Ysgol Gynradd Maesglas
• Ysgol Gynradd Pillgwenlli
• Ysgol Gynradd Maendy
• Ysgol Gynradd Tŷ-du
• Ysgol Gynradd Gwynllyw Sant
• Ysgol yr Eglwys yng Nghymru Malpas

Hefyd yn rhan o'r cynigion y mae cyllid i adeiladu ysgolion newydd yn y ddinas, a fydd wedi’u hariannu’n rhannol gan ddatblygwyr:

• Ysgolion Cynradd Glan Llyn a Llanwern
• Ysgol newydd sydd wedi’i chynnig ar safle datblygu Whiteheads

Mae hon yn rhaglen amlinellol strategol, felly efallai y bydd yr elfennau penodol yn cael eu newid gan ddibynnu ar y swm y cytunir ei fuddsoddi, a bydd rhywfaint o hyblygrwydd.