Newyddion

Ysgol Anhwylderau'r Sbectrwm Awtistig Newydd – y gyntaf yn y ddinas

Mae Cyngor Dinas Casnewydd wedi cymeradwyo datblygu ysgol arbennig newydd ar gyfer disgyblion gydag Anhwylderau'r Sbectrwm Awtistig (ASA).

Bydd yr adnodd arbenigol hwn, a leolir ar safle flaenorol Ysgol Fabanod Gaer, yn rhoi darpariaeth arbenigol ac addysgu wedi’i strwythuro i ddisgyblion rhwng 3 a 19 oed.

Bydd yr ysgol, sydd y gyntaf o’i bath, yn bwriadu rhoi addysg a chymorth o’r radd flaenaf i ddisgyblion waeth beth yw lefel yr addysg y maen nhw ei angen. Bydd gan ddisgyblion gyfleoedd hefyd i weithio a dysgu yn y gymuned er mwyn paratoi ar gyfer eu rôl yn y dyfodol fel aelodau gwerthfawr o'r gymdeithas.

Yn bennaf, bydd yr ysgol yn bodloni anghenion y disgyblion sy'n byw yng Nghasnewydd, gan eu galluogi i gael eu haddysgu'n agos i’w cartrefi. Bydd hyn yn lleihau niferoedd y lleoliadau allan o’r ddinas a’r teithiau hir o dro i dro y mae disgyblion yn eu hwynebu.  

Crëir yr ysgol trwy addasu ac ail-fodelu adeilad blaenorol Ysgol Fabanod Gaer a ddaeth yn wag ar ôl gwaith i atgyfnerthu’r ysgol ar safle blaenorol Ysgol Iau Gaer.

Yn gyffredinol mae angen mwy o le ar ddisgyblion gydag Anhwylderau'r Sbectrwm Awtistig er mwyn symud o gwmpas gydag elfennau acwstig ffafriol i atal gormod o straen ar y synhwyrau. Mae dyluniad a threfn yr ysgol newydd yn blaenoriaethu’r angen hwn.

Dywedodd Aelod Cabinet dros Addysg a Phobl Ifanc Cyngor Dinas Casnewydd, y Cynghorydd Gail Giles: “Bydd yr ysgol hon yn gyfleuster newydd gwych ar gyfer y ddinas ac ar gyfer pobl ifanc y mae angen y cymorth arbenigol hwn arnynt.

“Byddwn bellach yn gallu rhoi’r cyfle i ddisgyblion a’u teuluoedd i gael yr addysg orau posibl yn agos i’w cartrefi.”

Mae’r project wedi’i ariannu gan Gyngor Dinas Casnewydd a rhaglen Ysgolion yr 21ain Ganrif. Y bwriad yw sefydlu’r ysgol newydd fis Ebrill er mwyn ei hagor fis Medi 2017.