Newyddion

Tynnu Ysgol Uwchradd Casnewydd o fesurau arbennig

Yn dilyn ymweliad arolwg monitro Estyn diweddar, penderfynwyd atal mesurau arbennig yn Ysgol Uwchradd Casnewydd. 

Mae Arolygiaeth Ei Mawrhydi dros Addysg a Hyfforddiant yng Nghymru, wedi cadarnhau bod yr ysgol wedi gwneud cynnydd digonol ac nad oes angen y lefel hon o ymyrraeth mwyach. 

Dywedodd y Cynghorydd Jane Mudd, arweinydd y cyngor: "Mae'r penderfyniad hwn yn dyst i waith caled ac ymroddiad y pennaeth, staff a'r corff llywodraethu.  Rwy'n falch iawn o weld bod Estyn wedi cydnabod y camau mawr a wnaed gan yr ysgol ac rwy'n siŵr y bydd hynny'n parhau. Llongyfarchiadau i bawb dan sylw." 

Dywedodd y Pennaeth Gill Lee:  "Rydym mor falch bod Estyn wedi penderfynu bod cynnydd gan yr ysgol yn golygu bod modd tynnu’r mesurau arbennig. Nid oherwydd y gwaith a wnaed gan ambell un, mae'n gyflawniad gan y gymuned ysgol gyfan ac rydym yn benderfynol o wella a gwella." 

Dywedodd aelod cabinet dros addysg y Cyngor, y Cynghorydd Deb Davies: "Mae hyn yn newyddion gwych a hoffwn ddiolch i'r pennaeth, y staff a'r corff llywodraethu am eu gwaith i godi safonau er budd pob disgybl. 

"Erbyn hyn nid oes gan Gasnewydd unrhyw ysgolion dan fesurau arbennig a bydd y cyngor yn parhau i gefnogi ei ysgolion i wella'n barhaus i sicrhau bod plant y ddinas yn cael yr addysg orau bosibl." 

Ychwanegodd y Cynghorydd James Clarke, cadeirydd y corff llywodraethu: "Fel llywodraethwyr, ry'n ni wedi bod yn cydweithio'n agos gyda'r pennaeth a sicrhau ein bod yn gweithio fel tîm er lles yr ysgol.  Mae'r pennaeth a'r staff wedi gwneud gwaith gwych i gael yr ysgol allan o fesurau arbennig a gyda'n gilydd byddwn yn sicrhau bod yr ysgol yn parhau i wella." 

Mae'r ysgol bellach wedi dangos cynnydd da o ran argymhellion Estyn ac mae uchafbwyntiau’r adroddiad yn cynnwys:

• Mae'r pennaeth a'i uwch dîm arwain yn cyfleu eu gweledigaeth, yn seiliedig ar gydraddoldeb, ymrwymiad, a chyfanrwydd, yn glir o fewn yr ysgol.  Mae hyn yn hanfodol i ethos yr ysgol ac yn sylfaen i'w holl waith.  Mae wedi helpu arweinwyr i sicrhau gwelliannau addas mewn rhai agweddau pwysig o waith yr ysgol, gan gynnwys ansawdd yr addysgu ac asesu.
• Mewn gwersi, mae'r rhan fwyaf o ddisgyblion yn gyffredinol yn gwneud cynnydd da o ran eu gwybodaeth, eu dealltwriaeth a'u sgiliau. Mae'r disgyblion hyn yn dangos agwedd bositif tuag at eu dysgu ac yn cymryd rhan yn dda mewn ystod o weithgareddau.
• Mewn llawer o wersi, mae athrawon yn datblygu perthynas weithio dda gyda'u dosbarthiadau, sy'n helpu i hyrwyddo amgylchedd dysgu cadarnhaol.
• Mae'r disgyblion yn elwa ar ystod ehangach o gyfleoedd gwerth chweil i ddatblygu eu sgiliau llythrennedd ar draws y cwricwlwm.
• Mae'r ysgol wedi codi proffil datblygu llafaredd disgyblion mewn gwahanol bynciau ac mae'r disgyblion yn mwynhau ac yn elwa o drafod materion amserol gan gynnwys casineb annerbyniol at ferched a ph’un a yw chwaraeon yn dysgu gwerthoedd da i ni.
• Mae gweledigaeth uwch arweinwyr ynglŷn â sut i wella'r gefnogaeth ar gyfer disgyblion ag anghenion dysgu ychwanegol (ADY) yn parhau i gael effaith gadarnhaol ar arferion presennol.