Ysgolion Casnewydd i gynnal wythnos gyrfaoedd rithwir
Wedi ei bostio ar Friday 5th November 2021
Bydd disgyblion yng Nghasnewydd yn cael cyfle i ddysgu am fywyd yn y sector iechyd a gofal wythnos nesaf fel rhan o wythnos gyrfaoedd ar-lein.
Wedi'i anelu at ddisgyblion blwyddyn naw ac uwch, bydd y digwyddiad, a drefnir gan Gyrfa Cymru a’r bartneriaeth Casnewydd yn Un, yn gweld partneriaid a chyflogwyr o bob rhan o'r sector yn cynnal gweithdai rhithwir gyda disgyblion a fydd yn cwmpasu:
- Sut beth yw gweithio yn y maes iechyd a gofal
- Pa sgiliau a chymwysterau sydd eu hangen i weithio yn y sector
- Yr ystod o gyfleoedd gwaith sydd ar gael yn yr ardal leol
Bydd pob diwrnod yn canolbwyntio ar thema wahanol. Thema’r diwrnod cyntaf fydd yr addysg a’r hyfforddiant sydd eu hangen i weithio yn y sector, gyda gweddill yr wythnos yn canolbwyntio ar yrfaoedd mewn gofal plant, gofal iechyd, gofal cymdeithasol a gofal iechyd meddwl.
Bydd y deunydd a gyflwynir yn ystod yr wythnos yn parhau i fod ar gael i fyfyrwyr ar ôl y digwyddiad i'w helpu i ystyried dewisiadau a llwybrau gyrfa.
Yn ystod yr wythnos, bydd myfyrwyr yn clywed gan yr Athrawes Alka Ahuja MBE, seiciatrydd plant a phobl ifanc ymgynghorol ym Mwrdd Iechyd Prifysgol Aneurin Bevan.
Yr Athrawes Ahuja hefyd yw’r arweinydd clinigol cenedlaethol ar gyfer Gofal a Alluogir gan Dechnoleg Cymru, ac ef fu’n gyfrifol am uwchraddio gwasanaeth ymgynghori fideo GIG Cymru yn gyflym, a wnaeth ganiatáu i bobl barhau i gael mynediad at wasanaethau gofal iechyd gartref yn ystod y pandemig.
Wrth siarad cyn yr wythnos gyrfaoedd, dywedodd yr Athrawes Ahuja: "Mae gweithio yn y sector wedi rhoi cyfle i mi wneud gwahaniaeth i fywydau pobl, ac rwy'n gobeithio y bydd y digwyddiad hwn yn rhoi blas i fyfyrwyr o'r holl yrfaoedd a chyfleoedd sydd ar gael iddynt."
Dywedodd y Cynghorydd Jane Mudd, arweinydd Cyngor Dinas Casnewydd a chadeirydd y bartneriaeth Casnewydd yn Un: "Rwy'n falch iawn ein bod, ar gyfer ein hwythnos gyrfaoedd rithwir ddiweddaraf, yn tynnu sylw at y sector iechyd a gofal.
"Dros y ddwy flynedd ddiwethaf, yn fwy nag erioed, mae'r sector wedi dangos pa mor sylfaenol ydyw i'n bywydau bob dydd.
"Rwy'n gobeithio y bydd y digwyddiad hwn yn ysbrydoli disgyblion ledled Casnewydd i ystyried y sector hwn wrth ystyried eu gyrfa yn y dyfodol."
Meddai Mikki Down, rheolwr gweithredol a datblygu Gyrfa Cymru: "Mae'r pandemig wedi tynnu sylw at ba mor hanfodol yw gweithwyr iechyd proffesiynol yn fwy nag erioed o'r blaen.
"Mae digwyddiadau fel hyn yn gyfle gwerthfawr i ddysgu sut i gael mynediad i yrfa yn y maes iechyd a gofal cymdeithasol, gan nid yn unig helpu i ysgogi'r rhai sydd eisoes yn ystyried llwybr o'r fath, ond hefyd ysbrydoli eraill nad ydynt efallai wedi ei ystyried.
"Rydym wrth ein bodd o fod yn gweithio mewn partneriaeth â'r sefydliadau hyn a chyflogwyr lleol i helpu i godi ymwybyddiaeth ymhlith pobl ifanc o'r cyfleoedd gyrfa helaeth a gwerth chweil sydd ar gael yn y sector hanfodol hwn."
Mae rhagor o wybodaeth am y sesiynau ar gael yn https://gyrfacymru.llyw.cymru/digwyddiadau/wythnos-gyrfaoedd-y-sector-gofal-yng-nghasnewydd.