Canmoliaeth i gymunedau sy'n gweithio gyda'i gilydd
Wedi ei bostio ar Tuesday 16th June 2020
Un o agweddau cadarnhaol y pandemig coronafeirws yw'r ffordd y mae sefydliadau wedi gweithio gyda'i gilydd i helpu pobl mewn cymunedau.
Dywedodd y Cynghorydd Jane Mudd, Arweinydd Cyngor Dinas Casnewydd: "Mae wedi bod mor galonogol, a theimladwy, i weld pobl yn estyn allan i helpu eraill ar adeg o argyfwng.
"Mae gan Gasnewydd draddodiad hir o ddiwylliannau gwahanol sy'n byw ac yn gweithio mewn cytgord ac nid yn unig y mae hyn wedi dod i'r amlwg yn ystod y pandemig, mae hefyd yn cyferbynnu'n llwyr â rhai o'r golygfeydd a welsom yn ddiweddar mewn gwledydd eraill.
"Un enghraifft eithriadol o hyn yw gwaith Cymdeithas Gymunedol Iemenaidd Casnewydd a oedd am wneud gwahaniaeth i drigolion a oedd wedi'u hynysu'n gymdeithasol ac wedi dechrau dosbarthu pecynnau bwyd sawl wythnos yn ôl.
"Hoffwn ddiolch iddynt, y rhai a'u cefnogodd nhw - gan gynnwys staff y Cyngor, GAVO a Pobl - a'r holl grwpiau lleol eraill sydd wedi gweithio gyda ni i helpu unigolion a theuluoedd sy'n agored i niwed yn ein dinas. Rydym mor lwcus i gael pobl mor ofalgar yn byw yng Nghasnewydd."
Dywedodd Cadeirydd y Gymdeithas, Reggie an-Haddi: "Gorfodwyd pobl yn y gymuned i ynysu o ganlyniad i COVID 19 a theimlai'r Gymdeithas Iemenaidd ei bod mor bwysig i'w cefnogi drwy ddarparu pecynnau bwyd, er bod swyddi llawn amser gan lawer o'r gwirfoddolwyr yn ogystal â gofalu am eu teuluoedd eu hunain.
"Yn bwysicach, fe wnaethon ni ennill llawer mwy drwy helpu, creodd ymdeimlad o ysbryd cymunedol ac undod ar draws ein cymdogaethau. Dosbarthodd y Gymdeithas i bobl o bob cenedl ar draws y ddinas, yn cynnwys pobl Iemenaidd, Syriaidd, Eifftaidd, Swdanaidd, Affricanaidd, Jamaicaidd, Gwyn Cymreig ac Iranaidd, pwy bynnag oedd angen ein help. Gyda'n gilydd rydym yn gryfach."