Newyddion

Ardal ymarfer corff newydd i gael ei hagor yng Nghartref Cŵn Dinas Casnewydd

Lindsay Horth, Debbie Hayward, Susie James ,Lesley Sperinck, Nicola Rosendale, Paris Head, Councillor Ray Truman yn y cyflwyniad gwobrau

Disgwylir i barc ymarfer corff i gŵn – y cyntaf o’i fath yng Nghymru – gael ei agor gan Gyngor Dinas Casnewydd diolch i gyfraniad hael gan y partneriaid elusen, Friends of the Dogs Wales.

Mae’r safle dwy erw sydd ynghlwm wrth Gartref Cŵn Dinas Casnewydd ym Mharc Coronation yn Stephenson Street yn agos at y Bont Gludo eiconig.

Mae’r ardal ymarfer corff wedi’i defnyddio’n rhan o dreial gan dîm y cartref cŵn a’i grŵp cerdded gwirfoddol partner, a drefnir gan Opt to Adopt yng Nghasnewydd, i roi ymarfer corff i gŵn strae ac wedi’u gadael y maen nhw’n gofalu amdanyn nhw. 

A’r wythnos hon, cafodd eu gwaith caled o gychwyn y project ei gydnabod gan RSPCA Cymru a roddodd i’r cartref Wobr Arloeswr am y cynllun.

Hefyd cafodd y cartref wobr Aur RSPCA Cymru yn adran Ôl-troed Cŵn Strae y gwobrau PawPrints blynyddol.

Ar ôl i’r parc ymarfer corff gael ei agor yn ffurfiol i drigolion Casnewydd sydd â chŵn sy’n agored i niwed, er enghraifft cŵn sy’n debygol o redeg i ffwrdd, sy’n swil ac a allai gael eu hymosod arnynt gan gŵn eraill neu i’r rheiny sydd â chi gyda phroblemau ymddygiadol neu sy’n ymosodol, bydd y cyfleuster yn cynnig amgylchedd diogel lle gall y ci redeg yn rhydd.

Bydd perchenogion cŵn yn gallu trefnu dyddiad ac amser a thalu i ddefnyddio’r maes ar-lein.

I roi hwb i’r clynllun, gofynnir i berchenogion cŵn gofrestru eu diddordeb.

Llongyfarchodd y Cynghorydd Ray Truman, yr aelod cabinet dros drwyddedu a rheoleiddio, staff a gwirfoddolwyr am gael y gwobrau a chanmolodd bawb am eu gwaith caled o ran sicrhau bod y cytiau cŵn yn cael eu rhedeg heb broblemau a bod cŵn nad oes eu heisiau’n cael y gofal sydd ei angen arnyn nhw.

“Mae’r ardal ymarfer corff newydd yn ased gwych i’r cartref cŵn a hoffwn ddiolch i’n partneriaid elusen, Friends of the Dogs Wales ac Opt to Adopt Casnewydd am ein helpu ni i gyflawni hyn.

“Rydym yn gwybod bydd yr ardal hon yn cynnig lle diogel i berchenogion cŵn a’u hanifeiliaid anwes ymarfer corff ynddo heb boeni am beidio â chael eu cŵn ar dennyn ac efallai’n rhedeg i ffwrdd neu fod yn berygl i gŵn/pobl eraill.

“Hefyd mae gwobrau RSPCA yn gydnabyddiaeth o’r gwaith caled parhaol sy’n cael ei wneud gan ein staff sy’n sicrhau bod cŵn strae’n cael y gofal sydd ei angen arnyn nhw, rydyn ni hefyd yn falch o nifer y cŵn sy’n gallu cael eu hail-gartrefu,” meddai’r Cyng. Truman.<0}

Cafodd y gwobrau eu cyflwyno yn ystod dathliad yng Nghynulliad Cenedlaethol Cymru gan yr AC Lesley Griffiths, y gweinidog dros yr amgylchedd, ynni a materion gwledig ar 23 Medi.