Newyddion

Lansio GDMC diwygiedig

Canol dinas Casnewydd GDMC diwygiedig

Bydd Cyngor Dinas Casnewydd yn lansio ei Orchymyn Diogelu Mannau Cyhoeddus (GDMC) diwygiedig ar gyfer canol y ddinas wythnos yma.

Bydd y lansiad yn cyd-daro â Diwrnod Gweithredu Canol y Ddinas ddydd Iau 18 Hydref pan fydd Aelod Cabinet y cyngor dros Drwyddedu a Rheoleiddio, y Cynghorydd Ray Truman, yn ymuno â phartneriaid y cyngor, gan gynnwys Heddlu Gwent, Gwasanaeth Tân ac Achub De Cymru, cymdeithasau tai a sefydliadau trydydd sector, i hyrwyddo diogelwch cymunedol.

Nod y Diwrnod Gweithredu o gwmpas St Paul’s Walk yw gwella lles canol y ddinas, mynd i’r afael â phryderon trosedd ac ymddygiad gwrthgymdeithasol, gwella ymddiriedaeth a hyder y gymuned mewn sefydliadau partner a hyrwyddo cynnwys y gymuned.

Cyflwynwyd GDMC cyntaf canol y ddinas ym mis Tachwedd 2015 ac yn gynharach eleni penderfynodd y cyngor ei bod hi’n amser i’w adolygu, gan ystyried yr hyn sydd wedi gweithio dros y ddwy flynedd ddiwethaf, pa gyfyngiadau sydd angen eu cadw neu eu diwygio ac a oes angen cyfyngiadau newydd i fynd i’r afael â mathau eraill o ymddygiad gwrthgymdeithasol yng nghanol y ddinas.

Yn dilyn ymgynghori â’r cyhoedd, mae gan GDMC canol y ddinas reolaethau llymach ar gardota ac ymddygiad gwrthgymdeithasol.

Dywedodd y Cyng. Truman: “Gwnaethom ymgynghori â’r cyhoedd ar GDMC diwygiedig canol y ddinas, a bydd y cyfyngiadau newydd ar gardota ac ymddygiad gwrthgymdeithasol yn rhoi’r pwerau i’r heddlu fynd i’r afael â hyn.

 “Mae’r bartneriaeth hon yn allweddol fel ein bod i gyd yn gweithio gyda’n gilydd i wneud Casnewydd yn lle mwy diogel a dymunol i fyw a gweithio.”

Croesawyd y pwerau ychwanegol a roddir gan GDMC diwygiedig canol y ddinas gan Arolygydd Canol Dinas Casnewydd, John Davies o Heddlu Gwent.

Dywedodd: “Mae Gorchmynion Diogelu Mannau Cyhoeddus yn cael eu defnyddio gan y ddinas i ddiogelu ein cymunedau rhag ymddygiad sy’n cael, neu sy’n debygol o gael, effaith negyddol ar ansawdd bywyd.

“Bydd y pwerau a roddir gan y GDMC newydd yn sicrhau y gallwn fynd i’r afael â’n prif flaenoriaethau, sef taclo ymddygiad gwrthgymdeithasol a chardota, mewn modd holistig gyda’n partneriaid. Mae’n rhan fechan o’r gwaith sy’n cael ei wneud bob dydd i wneud y ddinas yn lle diogel i drigolion, gweithwyr ac ymwelwyr.

“Byddwn yn annog unrhyw un sy’n dioddef o broblem benodol yn ei gymuned i gysylltu â’i Dîm Cymdogaeth lleol i drafod ei bryderon, neu ffonio 101. Os gwelwch drosedd yn digwydd o flaen eich llygaid, ffoniwch 999.”