Newyddion

Gwobr Ysbryd Casnewydd

Leader Debbie Wilcox, the Mayor Councillor David Fouweather with Liz Johnson and Mike Flynn with their Spirit of Newport awards

Bydd tri o bobl o gefndiroedd gwahanol iawn yn derbyn Gwobr Ysbryd Casnewydd, i gydnabod cyfraniad anferthol dinasyddion â chysylltiad â’r ddinas.

Dyma’r tro cyntaf i’r Wobr hon gael ei chyflwyno.  Crëwyd y wobr hon gan Gyngor Dinas Casnewydd i ddangos pa mor bwysig yw hi i’r ddinas gydnabod a gwobrwyo’r bobl sy’n gwneud ein dinas yn gystal un – boed hynny drwy lwyddiant mewn chwaraeon, gwaith elusennol, twf busnesau, y celfyddydau, addysg, neu drwy ddangos dewrder a dycnwch wrth wynebu helbulon.

Mae’n bleser gan y Cyngor gyhoeddi y bydd yr Arweinydd, y Cynghorydd Debbie Wilcox yn cyflwyno tair Gwobr Ysbryd Casnewydd yng nghyfarfod y cyngor llawn ddydd Mawrth, 27 Chwefror.

Ymhlith y tri mae’r cyn-filwr a’r gwr fu’n codi arian ar gyfer cronfa’r pabi ers blynyddoedd, Ron Jones o Fasaleg sy’n gant oed. Derbyniodd BEM am wasanaethau i’r gymuned y llynedd.

Mike Flynn yw rheolwr Clwb Pêl-droed Casnewydd, roddodd ein dinas ar y map pan gyrhaeddodd y tîm y gemau ail-chwarae ym mhedwaredd rownd Cwpan yr FA yn Wembley, a hynny ar ôl iddyn nhw gael gêm gyfartal o un gôl yr un yn erbyn Tottenham Hotspur o’r Uwch-Gynghrair, gerbron y torfeydd mwyaf erioed yn Rodney Parade.

Mae’r nofiwr Paralympaidd Liz Johnson, sy’n hanu o Gasnewydd, wedi ennill medalau aur yn y Gemau Paralympaidd a phencampwriaethau byd y Pwyllgor Paralympaidd Rhyngwladol (yr IPC). 

Dechreuodd Liz, a gafodd ei geni â pharlys yr ymennydd, nofio yn dair oed gan syrthio mewn cariad â’r gamp. Yn ddim ond 14 oed cafodd ei dewis i nofio dros Team GB, gan hudo torfeydd gyda’i llwyddiant dros y blynyddoedd, ac ennill y Fedal Efydd yng Ngemau Paralympaidd Llundain 2012.

Dywedodd y Cynghorydd Wilcox: “Mae hon yn wobr fodern, ac mae’n gyfle i bobl Casnewydd enwebu’r bobl sydd wedi dangos i ni sut gall yr agwedd a’r dycnwch cywir gyflawni bron unrhyw beth, waeth beth fo’r amgylchiadau.

“Ni fydd y wobr hon yn cael ei chyflwyno yn rheolaidd – dim ond pan fydd enillydd teilwng sy’n ymgorffori gwerthoedd a phriodweddau Ysbryd Casnewydd yn dod i’r amlwg.

“Rwyf wrth fy modd bod gennym enillwyr teilwng yn Ron Jones, Michael Flynn a Liz Johnson, oll â chysylltiad â Chasnewydd ac wedi profi eu bod yn haeddu’r wobr. Rwy’n eu llongyfarch i gyd am fod y rhai cyntaf i gael eu hanrhydeddu yn y fath fodd gan y ddinas.”